CAPÍTULO I · DA ASOCIACIÓN EN XERAL
Artigo 1. Denominación e natureza
Coa denominación “MAREA MUSIC”, constitúese unha organización de natureza asociativa e sen ánimo de lucro, ao amparo do disposto no artigo 22 da Constitución Española, na Lei orgánica 1/2002, do 22 de marzo, reguladora do dereito de asociación e demais lexislación aplicable.
Artigo 2. Personalidade e capacidade
A asociación constituída ten personalidade xurídica propia e plena capacidade de obrar, podendo realizar todos aqueles actos que sexan necesarios para o cumprimento da finalidade para a que foi creada, con suxeición ao establecido no ordenamento xurídico.
Artigo 3. Domicilio
Para esta versión web non se reproduce o domicilio social por motivos de privacidade. O documento oficial dos estatutos poderá facilitarse como documento institucional cando corresponda.
Correo electrónico: asociacion@mareamusic.es
Páxina web: mareamusic.es
Artigo 4. Ámbito de actuación
O ámbito territorial no que a asociación vai a desenvolver principalmente as súas actividades é a Comunidade Autónoma de Galicia.
Artigo 5. Duración
- A asociación constitúese por tempo indefinido e só se disolverá, conforme a estes Estatutos, por acordo da Xunta Directiva en reunión extraordinaria ou por causas previstas na lexislación vixente.
- A asociación rexerase segundo os principios democráticos contidos no marco da Constitución e o resto do ordenamento xurídico.
Artigo 6. Fins
Son fins principais da asociación:
- Fomentar a difusión e posta en valor da cultura, da creatividade e da diversidade artística.
- Apoiar e visibilizar propostas escénicas, musicais, audiovisuais ou performativas, tanto locais como doutras procedencias.
- Promover e dinamizar actividades culturais e sociais no ámbito local e autonómico.
- Xerar espazos de encontro, participación e intercambio cultural entre a cidadanía e os axentes culturais.
- Fomentar a participación cidadá a través de actividades culturais con impacto social positivo.
- Promover a sustentabilidade ambiental na planificación e execución das actividades, minimizando o impacto ecolóxico.
- Recadar fondos ou recursos destinados a causas sociais, humanitarias ou solidarias.
- Calquera outro fin que se corresponda coa natureza da entidade e que poida ser decidida polos seus órganos de goberno.
Para levar a cabo os seus fins, a asociación poderá organizar, entre outras, organización, promoción e difusión de actividades culturais e artísticas en xeral; festivais, concertos, xiras e outros eventos musicais, incluíndo actividades de booking, contratación e management de artistas, así como eventos de carácter benéfico; obradoiros, relatorios, ciclos de cinema e outras actividades formativas e divulgativas; colaboracións con outras entidades ou colectivos; accións divulgativas; e calquera actividade que contribúa ao mellor cumprimento dos seus fins.
A asociación poderá realizar actividades económicas de todo tipo, encamiñadas ao cumprimento dos seus fins. Os beneficios que se obteñan por calquera concepto destinaranse exclusivamente ao cumprimento destes fins, sen que se poidan repartir entre as persoas asociadas nin outras persoas físicas ou xurídicas con interese lucrativo.
CAPÍTULO II · DAS PERSOAS ASOCIADAS
Artigo 7. Requisitos
- Para adquirir a condición de persoa asociada requírese ser persoa física ou xurídica e ter interese no desenvolvemento dos fins da asociación.
- As persoas físicas deben ser maiores de idade ou menores emancipadas con capacidade de obrar e non estar suxeitas a inhabilitación ou condición legal para o exercicio do dereito.
- En caso de que algún dos membros fundadores perda a condición de socio por baixa voluntaria ou outras causas, a asociación poderá continuar co seu funcionamento sempre que manteña un mínimo de tres persoas asociadas, podendo incorporar novas persoas asociadas en calquera momento conforme ao procedemento establecido nestes estatutos.
- A incorporación de novas persoas asociadas poderá realizarse mediante acordo unánime da Xunta Directiva.
Artigo 8. Clases de persoas asociadas
Dentro da asociación poderán existir as seguintes clases de persoas asociadas: fundadoras, de número e de honra, nos termos descritos nos estatutos.
Artigo 9. Perda da condición de persoa asociada
A condición de persoa asociada pérdese por vontade propia; por incumprimento dos estatutos ou acordos validamente adoptados; por falecemento da persoa física ou extinción da persoa xurídica; ou por acordo da Xunta Directiva nos supostos previstos, con audiencia previa e ratificación nos termos establecidos.
Artigo 10. Dereitos
As persoas asociadas teñen dereito a participar nas actividades, ser electoras e elixibles, participar nas asembleas con voz e voto, recibir información sobre os órganos de representación, as contas e a actividade, acceder á documentación, ser oídas en medidas disciplinarias e impugnar os acordos contrarios á lei ou aos estatutos. As persoas asociadas de honra terán voz pero non voto e estarán exentas de obrigas.
Artigo 11. Obrigas
Son obrigas das persoas asociadas cumprir os estatutos e acordos, desempeñar as obrigas dos cargos para os que fosen elixidas, asistir ás asembleas e demais actos organizados e contribuír, na medida das súas posibilidades, ao cumprimento dos fins.
CAPÍTULO III · DOS ÓRGANOS DA ASOCIACIÓN
Artigo 12. Organización da asociación
O órgano de goberno é a asemblea xeral, integrada polas persoas asociadas, e o órgano de representación é a Xunta Directiva. Ambos adoptarán os seus acordos conforme ao principio maioritario ou de democracia interna.
Artigo 13. Asemblea xeral
A asemblea xeral é o órgano supremo de goberno da asociación e está integrada por todas as persoas asociadas.
Artigo 14. Reunións e convocatoria
As reunións poden ser ordinarias ou extraordinarias. A ordinaria celebrarase como mínimo unha vez ao ano dentro dos catro meses seguintes ao peche do exercicio económico. As convocatorias realizaranse por escrito, con orde do día e co prazo mínimo establecido nos estatutos.
Artigo 15. Constitución e quórum
As asembleas xerais quedarán validamente constituídas conforme ao quórum previsto nos estatutos, podendo celebrarse presencialmente ou a distancia sempre que se garanta a identidade, o contido das manifestacións, o momento no que se producen e a interactividade e intercomunicación en tempo real.
Artigo 16. Facultades da asemblea xeral ordinaria
Corresponde á asemblea xeral ordinaria examinar e aprobar contas e balances, orzamentos, plan de actividades, cotas, elección e cesamento da Xunta Directiva, federacións, utilidade pública e regulamento de réxime interno, nos termos estatutarios.
Artigo 17. Facultades da asemblea xeral extraordinaria
Corresponde, entre outras, modificar os estatutos, acordar transformación, fusión ou disolución e designar liquidadores nos termos previstos.
Artigo 18. Adopción de acordos
Os acordos adoptaranse por maioría simple, salvo os supostos que esixen maioría absoluta conforme aos estatutos.
Artigo 19. A Xunta Directiva: composición
A Xunta Directiva é o órgano de representación e estará formada por Presidencia, Secretaría e Tesouraría, podendo engadirse Vicepresidencia e Vogais. O mandato é de tres anos, con posibilidade de reelección. Os cargos serán gratuítos, sen prexuízo do reembolso de gastos xustificados. As persoas integrantes poderán percibir retribución por servizos profesionais distintos das funcións do cargo cando exista contrato formal e se cumpran os requisitos de transparencia previstos.
Artigo 20. Reunións e acordos
A Xunta Directiva poderá reunirse de forma presencial ou a distancia nos termos establecidos e adoptará os acordos pola maioría dos votos das persoas asistentes.
Artigo 21. Facultades da Xunta Directiva
Corresponde á Xunta Directiva programar e dirixir actividades, xestionar administrativa e economicamente a asociación, executar os acordos da asemblea, formular orzamentos e contas, convocar asembleas, propor cotas, designar comisións de traballo, ditar normas internas, resolver solicitudes de ingreso e procedementos disciplinarios e impulsar o plan de actividades.
Artigo 22. Obrigas documentais
A asociación disporá dunha relación actualizada de persoas asociadas, documentación contable, inventario de bens e libro de actas, nos termos previstos.
Artigo 23. Presidencia
A Presidencia representa legalmente á asociación, convoca e preside a Xunta Directiva e a Asemblea Xeral, ordena pagamentos e executa os acordos adoptados.
Artigo 24. Vicepresidencia
A Vicepresidencia substitúe á Presidencia nos casos de ausencia ou enfermidade e pode actuar en representación cando así se acorde.
Artigo 25. Secretaría
A Secretaría tramita altas e baixas, formaliza convocatorias, redacta actas, expide certificacións, custodia o arquivo e cumpre as obrigas documentais correspondentes.
Artigo 26. Tesouraría
A Tesouraría recada e custodia fondos, intervén en cobros e pagamentos, elabora o anteproxecto de orzamentos, leva os libros de contabilidade e prepara as contas anuais.
Artigo 27. Vogais
As persoas vogais terán as obrigas propias do cargo e aquelas que lles sexan encomendadas, podendo realizar programas e estudos ou participar en áreas de actuación determinadas.
CAPÍTULO IV · RÉXIME ECONÓMICO
Artigo 28. Patrimonio inicial
A asociación inicia as súas actividades cun patrimonio de 0 euros. O exercicio económico coincide co ano natural e péchase o 31 de decembro.
Artigo 29. Recursos económicos
Os recursos poden proceder de cotas, doazóns, subvencións e achegas, ingresos polo desenvolvemento das actividades e outros ingresos admitidos pola normativa.
Artigo 30. Contas anuais
Anualmente elaboraranse as contas anuais e unha memoria das actividades realizadas, que estarán á disposición das persoas asociadas dentro do prazo previsto.
Artigo 31. Destino de ingresos a fins da asociación
Como entidade sen ánimo de lucro, os beneficios derivados do exercicio de actividades económicas, incluídas as prestacións de servizos, destinaranse exclusivamente ao cumprimento dos fins da asociación e non poderán ser repartidos entre persoas asociadas nin outras persoas con interese lucrativo.
CAPÍTULO V · DO REGULAMENTO DE RÉXIME INTERNO
Artigo 32. Regulamento de réxime interno
A asemblea xeral poderá aprobar un regulamento de réxime interno para desenvolver as materias non contempladas directamente nos estatutos.
CAPÍTULO VI · DISOLUCIÓN E LIQUIDACIÓN
Artigo 33. Disolución
A asociación disolverase por acordo adoptado na asemblea xeral extraordinaria, polas causas previstas no Código Civil, por sentenza xudicial firme ou polas demais causas previstas nos estatutos.
Artigo 34. Liquidación
Acordada a disolución, abrirase o período de liquidación. As persoas integrantes da Xunta Directiva actuarán como liquidadoras, salvo designación distinta. O patrimonio resultante destinarase aos fins previstos nos estatutos ou no acordo de disolución, sen desvirtuar a natureza non lucrativa da entidade.
DISPOSICIÓN ADICIONAL
En todo canto non estea previsto nos presentes estatutos aplicarase a Lei Orgánica 1/2002, do 22 de marzo, reguladora do Dereito de Asociación e demais disposicións complementarias.
En Betanzos, a 31 de outubro de 2025.